?Met ons jaarlikse reeks #dagindielewe, wat in Mei ter viering van Werkersdag verskyn, vestig ons spesiaal die aandag op ons personeellede by die Universiteit Stellenbosch (US). Vanjaar stel ons jou bekend aan professionele administratiewe steundienstepersoneel wat 'n tasbare verskil in studente se lewens maak.
Viwe Benxa gee studente toegang tot geleenthede deur alumninetwerke, werksessies en skenkingsveldtogte wat lewens verander. As ko?rdineerder van alumnideelname, help skep hy 'n kultuur van ruimhartigheid om te sorg dat studente ondersteun, bemagtig en toegerus word vir die lewe ná universiteit. Benxa vertel ons meer oor sy werk by die Universiteit.
Wat behels jou werk by die US?
Ek is Ontwikkeling en Alumnibetrekkinge se ko?rdineerder van alumnideelname, maar ek grap altyd dat my werk nie regtig soveel direkte interaksie met alumni behels nie. My rol gaan meer oor daaglikse skakeling met ons studentegemeenskap om die skenkingskultuur onder alumni te koester. Wanneer ek wél direk met alumni te doen kry, is dit om ruimtes te skep waar hulle met ons studente kan skakel, hetsy deur die voorsiening van loopbaanadvies, netwerkvorming of filantropie.
Hoe lyk 'n tipiese dag by die werk?
Elke dag verskil. Ek bestee baie tyd daaraan om geleenthede vir studente en alumni te bestuur en te ko?rdineer, of deel te neem aan werksessies en opleiding vir studenteleiers oor hoe om doeltreffend met alumni te skakel en die krag van skenking te benut. Ek ko?rdineer gewoonlik studenteverwante aktiwiteite soos Voorgradedag en die #GivingMaties-veldtog – alles met die oog daarop om studente sowel professioneel as persoonlik te help ontwikkel.
Hoe het jou opleiding of vorige ervarings jou vir dié werk voorberei??
Ek dink my agtergrond in maatskaplike werk stel my in staat om platforms te skep waar studente, personeellede en alumni op 'n waardige en opwindende manier kan teruggee. My bemarkingsgraad het my weer die projekbestuurs- en kommunikasievaardighede gegee om inisiatiewe te ko?rdineer en fasiliteer wat ons studentegemeenskap én alumni bemagtig.
Wat geniet jy die meeste van jou rol en werk by die US?
Ek geniet dit om met elke inisiatief, veldtog en interaksie te voel dat dié werk saak maak. Dit is 'n onbeskryflike gevoel wanneer studente na my toe kom en sê “Jou werksessie op Voorgradedag het my gehelp om my eerste werk te kry" of “Ek het goed gevaar in my assesserings, want dit was nie nodig om my te bekommer oor waar my volgende ete vandaan sou kom nie" of “Ek het my rybewys gekry danksy die US se geldinsamelingsinisiatiewe".
Vertel ons iets opwindend oor jouself wat min mense sou verwag.
Ek was 'n Padvinder toe ek klein was. Padvinders leer jou 'n klomp goed wat jou as mens help ontwikkel. Een les wat my bybly, is 'n filosofie van die stigter van die Padvinders, naamlik “Probeer om die wêreld 'n bietjie beter agter te laat as wat jy dit gekry het". My werk draai daarom om studente as mense én as toekomstige beroepslui te bevorder en te ontwikkel, en ek probeer benader elke taak met daardie filosofie in gedagte.
FOTO en VIDEO: Ubaid Abrahams
